Finss.az xəbər verir ki, İtaliyanın antiinhisar tənzimləyicisi Autorita Garante della Concorrenza e del Mercato (AGCM) İrlandiyanın aşağı büdcəli aviaşirkəti Ryanair-i 255 milyon avro məbləğində cərimələyib. Cərimənin səbəbi aviaşirkətin veb saytında üçüncü tərəflərin aviabilet alışına mane olması kimi qiymətləndirilib.

Tənzimləyicinin açıqlamasına görə, Ryanair səyahət agentliklərinin və üçüncü tərəf platformalarının digər aviaşirkətlərin uçuşları və əlavə səyahət xidmətləri ilə birlikdə biletlər satmasının qarşısını almaq üçün xüsusi texniki və inzibati tədbirlər görüb. Bu addımlar bazarda rəqabətin məhdudlaşdırılması kimi dəyərləndirilib.

AGCM-nin apardığı araşdırma nəticəsində müəyyən edilib ki, qanun pozuntuları 2023-cü ilin aprelindən 2025-ci ilin aprelinə qədər olan dövrdə baş verib. Tənzimləyici orqan bu müddət ərzində Ryanair-in bazar mövqeyindən sui-istifadə etdiyini bildirib.

AGCM-nin hesablamalarına əsasən, Ryanair hazırda İtaliyaya və İtaliyadan həyata keçirilən uçuşların 38–40%-ni təmin edir, bu isə şirkətə ölkənin aviasiya bazarında ciddi təsir imkanı yaradır.

Maraqlıdır ki, tənzimləyici təzyiqlərə baxmayaraq, 2025-ci ilin əvvəlindən etibarən Ryanair-in bazar kapitallaşması 54,5% artaraq 31,04 milyard avroya çatıb. Bu göstərici investorların şirkətin maliyyə dayanıqlığına və gələcək perspektivlərinə olan inamını əks etdirir.