Finss.az - İngiltərə Bankı (Bank of England) əsas faiz dərəcəsini 25 bazis bəndi azaldaraq illik 3,75%-ə endirib.

Qərar Trading Economics tərəfindən təqdim edilən analitik konsensus proqnozuna uyğun gəlir. Pul Siyasəti Komitəsinin (MPC) doqquz üzvündən beşi faiz dərəcəsinin azaldılmasını dəstəkləyib, dörd üzv isə mövcud səviyyədə saxlanılmasını müdafiə edib.

Mərkəzi bankın rəhbəri Endryu Beyli, Sara Breeden, Svati Dhingra, Deyv Ramsden və Alan Teylor faiz dərəcəsinin yumşaldılmasına səs veriblər. Noyabr iclasında Beyli faiz səviyyəsinin dəyişdirilməməsini dəstəkləyirdi, lakin bu dəfə mövqeyini dəyişərək qərarda həlledici rol oynayıb.

Nəticədə, İngiltərə Bankının faiz dərəcəsi 2023-cü ilin fevral ayından bəri ən aşağı səviyyəyə endirilib.

Böyük Britaniyada illik istehlakçı inflyasiyası noyabr ayında 3,2%-ə qədər yavaşlayıb. Bankın mətbuat açıqlamasında qeyd olunur ki, hədəf səviyyə olan 2%-dən yuxarı olsa da, inflyasiyanın 2%-ə qayıtması gözləniləndən daha sürətli baş verəcək.

Tənzimləyici orqan vurğulayır ki, məhdudlaşdırıcı pul siyasəti, zəif iqtisadi artım və zəifləyən əmək bazarı fonunda xidmət sektorunda əmək haqqı və qiymət artım tempi azalmağa davam edir. Bu da iqtisadiyyatın yumşaldılmış pul siyasətindən faydalanmasını təmin edir.

İngiltərə Bankının faiz qərarı bazar iştirakçıları, investorlar və iqtisadi analitiklər üçün önəmli göstərici olmaqla, Böyük Britaniya iqtisadiyyatının gələcək performansını izləmək üçün vacib bir nüansdır.