Finss.az xəbər verir ki, əvvəlki həftə müşahidə olunan ucuzlaşmadan sonra dünya neft bazarında qiymətlər bazar ertəsi səhəri artım nümayiş etdirib.

Moskva vaxtı ilə saat 8:14-ə olan məlumata görə, London ICE Futures Birjasında fevral ayı üçün Brent markalı neftin fyuçersləri 0,32 dollar və ya 0,52% bahalaşaraq bir barel üçün 61,44 dollara yüksəlib. Qeyd edək ki, ötən cümə günü Brent neftinin qiyməti 0,16 dollar və ya 0,26% azalaraq 61,12 dollar səviyyəsində qərarlaşıb.

Eyni zamanda, Nyu-York Ticarət Birjasında (NYMEX) elektron ticarət zamanı yanvar ayı üçün WTI markalı xam neftin fyuçersləri 0,29 dollar və ya 0,5% artaraq bir barel üçün 57,73 dollara çatıb. Əvvəlki ticarət sessiyasında isə WTI fyuçersləri 0,16 dollar və ya 0,28% ucuzlaşaraq 57,44 dollar olub.

Analitiklərin məlumatına görə, son bir həftə ərzində həm Brent, həm də WTI nefti 4%-dən çox dəyər itirib. Buna baxmayaraq, yeni həftənin əvvəlində neft qiymətlərində müşahidə olunan artım bazarda qısamüddətli nikbinlik yaradıb.