Finss.az - Təxminən 550 Starbucks mağazasının işçilərini təmsil edən həmkarlar ittifaqı Workers United açıqlayıb ki, ABŞ-da şirkət işçiləri arasında tətil genişlənməkdə davam edir. Məlumata görə, ilk olaraq 34 şəhərdə yüzlərlə barista tətilə qoşulub və etiraz aksiyası hazırda 130 şəhərdə yerləşən 180-dən çox Starbucks mağazasına yayılıb.

İttifaq nümayəndələri bildirirlər ki, bu prosesin miqyası nəzərə alınarsa, baş verənlər Starbucks tarixində ən böyük tətil ola bilər.

Tətil aksiyasına 13 noyabrda, ABŞ-ın 40 şəhərindəki 65 mağazada start verilib. Etirazlar Starbucks-ın məşhur Qırmızı Kubok Günü (Red Cup Day) kampaniyası ilə eyni vaxta təsadüf edib. Bu kampaniya çərçivəsində müştərilər mövsümi içki aldıqları zaman xüsusi dizayn edilmiş, təkrar istifadə edilə bilən qırmızı fincan hədiyyə alırlar. Sentyabr-dekabr dövründə markanın ən güclü satış aksiyalarından biri hesab olunan bu gün çoxsaylı Starbucks azarkeşi üçün ənənəvi kolleksiya hadisəsinə çevrilib.

Həmkarlar ittifaqı bildirir ki, tətillər əmək şəraiti, iş yükü və əməkhaqqı ilə bağlı narazılıqlardan qaynaqlanır və etirazların daha genişmiqyaslı olacağı istisna edilmir.