Finss.az xəbər verir ki, amerikalı iş adamı Maykl Dell və həyat yoldaşı Syuzan Dell ABŞ-dakı uşaqlara öz investisiya hesablarını yaratmaq imkanı verməyi hədəfləyən və “Tramp hesabları” kimi tanınan Invest America təşkilatına 6,25 milyard dollar bağışlamağı planlaşdırırlar.

Bu təşəbbüs ABŞ Prezidenti Donald Tramp tərəfindən elan edilmiş və hökumət tərəfindən 2025–2028-ci illər arasında ölkədə doğulan hər bir uşağın adına avtomatik olaraq 1000 dollarlıq investisiya hesabı açılmasını nəzərdə tutur. Proqramın 4 iyul 2026-cı ildə qüvvəyə minməsi planlaşdırılır.

Yeni yaradılacaq hesablar indeks fondlarına yatırılacaq və uşaqlar yalnız 18 yaşına çatdıqdan sonra vəsaitə çıxış əldə edəcəklər. Pul vəsaitləri ali təhsil, ipoteka üçün ilkin ödəniş və ya startap qurmaq kimi məqsədlərlə istifadə oluna biləcək.

Dell cütlüyünün bu ianəsi proqramın maliyyə dayanıqlığını artırmaqla yanaşı ABŞ-da uşaq investisiya mədəniyyətinin formalaşdırılmasına mühüm töhfə kimi qiymətləndirilir.