Finss.az - 2025-ci ilin əvvəlindən ABŞ-ın idxal tariflərini artırması dünya iqtisadiyyatında ciddi narahatlıq yaradıb.

UBS analitikləri xəbərdarlıq edirlər ki, bu artımların təsiri artıq hiss olunmağa başlayıb və ticarət mühitində qeyri-müəyyənlik güclənir.

Hazırda ABŞ-ın tətbiq etdiyi orta tarif dərəcəsi 16%-ə çatıb ki, bu da ilin əvvəlindən etibarən 2% artım deməkdir. Ayrı-ayrı hallarda isə tariflər 70%-ə qədər yüksəlir.

Prezident Donald Trampın bəzi ölkələrə qarşı planlaşdırdığı “cavab” tariflərinə verilən möhlət 9 iyulda başa çatır. Ağ Ev bu tariflərin ən tez 1 avqustdan qüvvəyə minəcəyini bildirir. Bu isə bəzi ölkələrə danışıqlar aparmaq üçün təxminən 3 həftəlik vaxt verir.

Tramp administrasiyası artıq Böyük Britaniya və Vyetnamla ilkin razılaşmaları elan edib, Çinlə isə müvəqqəti ticarət atəşkəsi əldə olunub. Yeni razılaşmaların yaxın günlərdə açıqlanacağı gözlənilir.

UBS-in hesablamalarına əsasən, tarif artımları ABŞ idxalçıları üçün illik 500 milyard dollara qədər əlavə vergi yükü yarada bilər. Şirkət analitikləri xəbərdarlıq edirlər ki, bu yük son nəticədə həm istehlakçı qiymətlərinə, həm də biznes xərclərinə təsir göstərəcək.

“Tariflərə qarşı qabaqlayıcı tədbirlər kimi sifarişlərin irəliləməsi yaxın aylarda tələbdə zəifləməyə gətirib çıxara bilər”, — UBS qeyd edir.