Finss.az xəbər verir ki, Danimarkanın baş naziri Mette Frederiksen deyib ki, Ukraynanın müttəfiqləri Rusiya ərazisinə dərin zərbələr endirmək üçün Qərb silahlarından istifadə etməyə icazə verməlidirlər. Onun fikrincə, Ukrayna üçün bu cür məhdudiyyətlərin aradan qaldırılması münaqişənin genişlənməsinə səbəb olmayacaq.

“Mənim təklifim qırmızı xətlərin müzakirəsini dayandırmaqdır. Bu müharibə zamanı qırmızı xətlərlə bağlı ictimai müzakirələrin aparılması səhv idi”, – xanım Frederiksen bildirib.

O qeyd edib ki, Rusiya 2022-ci ilin fevralında xüsusi hərbi əməliyyata başlayanda “ən vacib qırmızı xətti artıq keçib”. Danimarkanın baş naziri həmçinin Ukraynaya silah tədarükündəki gecikmələri aradan qaldırmağa çağırıb. O, münaqişənin özünü qlobal adlandırıb.

2023-cü ildə Danimarka Ukraynaya 19 F-16 qırıcısı tədarük edəcəyinə söz verdi. 2024-cü il may ayının sonunda Danimarkanın xarici işlər naziri Lokke Rasmussen Ukraynanın Rusiya daxilindəki hərbi hədəflərə zərbələr endirmək üçün köçürülən qırıcılardan istifadə edə biləcəyini söylədi.

Kaira Agayeva

Finss.az