The Economist yazır ki, ABŞ iqtisadiyyatının yavaşlamasında demokratlar günahlandırıla bilər, bu isə onların namizədi Kamala Harris-in prezidentliyə seçilməsinə mane ola bilər. Qəzet qeyd edir ki, əksər iqtisadi göstəricilər resessiyadan çox, iqtisadi artımın azalmasına işarə edir.
ABŞ iqtisadiyyatının mümkün yavaşlaması Demokratlar Partiyasının prezidentliyə namizədi Kamala Harris-in seçkilərdəki şanslarını azalda bilər və onun rəqibi, Respublikaçı Donald Trump-a üstünlük qazandıra bilər, çünki seçicilər iqtisadi problemlər üçün Demokrat hökumətini məsul tutmağa meyllidirlər.
Finss.az xəbər verir ki, məqalənin dərc olunduğu zaman Harris-in seçilmə şansı Trump-dan daha yüksəkdir: son sorğulara əsasən, seçicilərin orta hesabla 47,5%-i Harris-i, 45,8%-i isə keçmiş prezident Trump-ı dəstəkləyir.
Bəzi iqtisadi göstəricilər "qorxulu görünür", lakin ümumilikdə ABŞ iqtisadiyyatında resessiyadan çox, artımın yavaşlaması müşahidə olunur.
Tədqiqatlar göstərir ki, seçicilər ən çox son iqtisadi hadisələrə diqqət yetirirlər. Vergi sonrası adambaşına düşən real gəlirlərin artımı ilə iqtidar partiyasının hakimiyyətdə qalma müddəti ABŞ-da prezident seçkilərinin nəticələri ilə sıx əlaqədardır.
İlin əvvəlində əhalinin real gəlirləri hər kvartalda təxminən 1% artım göstərirdisə, iqtisadi artımın yavaşlaması ilə bu göstərici təxminən iki dəfə azalıb. Bunun nəticəsində seçicilərin Demokratlara olan etimadı da zəifləyib.
Eyni zamanda, ölkədə orta real əməkhaqqı Trump-ın 2016-cı ildə seçilməsindən bu yana 9,4% artıb.
Bundan əlavə, inflyasiya və işsizlik səviyyəsi, məsələn, Pensilvaniya kimi qərarsız ştatlarda, ölkə üzrə orta göstəricidən aşağıdır.
Bununla belə, seçicilər ümumilikdə Demokratların iqtisadi idarəçiliyini Respublikaçıların idarəçiliyi ilə müqayisədə daha zəif hesab edirlər. Bunun səbəblərindən biri də Biden-in prezidentliyi dövründə qiymətlərin təxminən 20% artması ola bilər.
Beləliklə, Demokratlar üçün real təhdid avqustun əvvəlində baş verən fond bazarlarının çökməsi deyil, Trump-ın Biden və Harris-i günahlandırdığı iqtisadi durğunluqdur. Lakin bu, Trump-ın mütləq qalib gələcəyi anlamına gəlmir. Məsələn, keçmiş prezident Barak Obama 2012-ci ildə iqtisadiyyatın zəif vəziyyətdə olmasına baxmayaraq, yenidən prezident seçildi.
Qeyd edək ki, avqustun 5-də son dövrlərdə ən böyük qlobal fond bazarlarının çökməsi baş verdi. Bu çöküşün səbəbi ABŞ-da resessiya ehtimalının 15%-dən 25%-ə yüksəlməsi olub. ABŞ Əmək Nazirliyinin hesabatına görə, iyul ayında işsizlik səviyyəsi gözlənilmədən 4,1%-dən 4,3%-ə yüksəlib və yeni iş yerlərinin sayı analitiklərin gözləntilərindən çox aşağı – 114 min olub. Bu məlumatlar əsasında Goldman Sachs bankının iqtisadçıları resessiya ehtimalını artırıblar.