Qırğızıstan Orta Dəhlizi Avropaya yüklərin tranziti üçün alternativ marşrut kimi nəzərdən keçirir.

Finss.az-ın Qırğızıstan mətbuatına istinadən verdiyi məlumata görə, bunu xarici işlər naziri Jeenbek Kulubayev nazirliyin 2024-cü ilin birinci yarısında fəaliyyətinin yekunlarına həsr olunmuş mətbuat konfransında bildirib.

“Rusiya dəhlizinin bağlanması ilə yüklərin Avropaya daşınması və tranziti xeyli çətinləşib. Hazırda bütün yüklər cənub dəhlizindən keçir: əvvəlcə İrana, oradan Türkiyəyə, daha sonra Avropaya, əks istiqamətdə isə analoji marşrutla göndərilir. Bununla belə, daşınma prosesini sürətləndirə biləcək alternativ yollar nəzərdən keçirilir. Onlardan biri Qazaxıstan, Türkmənistan, Azərbaycan və Qafqazdan keçən Orta Dəhlizdir”, - nazir qeyd edib.

Onun sözlərinə görə, bu layihələr avropalı tərəfdaşlar və Mərkəzi Asiya ölkələri ilə fəal şəkildə müzakirə olunur.

“Tərəfdaşlar regionda daşıma prosesini asanlaşdırmaq və ticarəti artırmaq üçün bu istiqamətdə birgə işləməyə hazırdırlar. Bu, həm də uzaq tərəfdaşlardan investisiya cəlb etməyə imkan verə bilər. Bu platformanın istifadəsi həm Mərkəzi Asiya ölkələri, həm də bizim üçün faydalıdır. Çünki bu vahid bazar kimi çıxış etməyə və regionun birgə inkişafına kömək etməyə imkan verir”, - J.Kulubayev bildirib.

Qeyd edək ki, Orta Dəhliz Çin, Qazaxıstan, Xəzər dənizi, Azərbaycan, Gürcüstan və Türkiyədən keçərək Avropa ölkələrinə qədər uzanır. 2023-cü ildə bu marşrutla 2,7 milyon ton yük (2022-ci ilə nisbətən 86 % çox) daşınıb, 2024-cü ildə yük axını 4 milyon tonu ötə bilər.

Kaira Ağayeva 

Finss.az