2024-cü ilin payızından İsveçdə bir sıra müəssisələr altı ay müddətinə dördgünlük iş həftəsi və ya əmək haqqının saxlanması yolu ilə qısaldılmış iş günü tətbiq edəcəklər.

Fins.az xəbər verir ki, təklif “4 Day Week Global” qeyri-kommersiya təşkilatının nümayəndəsi Anna-Karin Alder tərəfindən irəli sürülüb.

“Hesab edirəm ki, iş həyatında həm işləyə, həm də yaxşı istirahət edə bilməyimiz üçün daha çox vaxt ayrılmalıdır. Bu gün xəstələrin sayının artması bir çox hallarda işdə həddindən artıq yorulmaqla əlaqələndirilir”, - o deyib.

Prosesə Stokholm İqtisadiyyat Məktəbinin tədqiqatçısı və Karlstad Universitetinin müəllimi Lena Lid Falkmanın rəhbərlik etdiyi tədqiqat qrupu nəzarət edəcək. Tədqiqatın nəticələri “4 Day Week Global” təşkilatının Kembric Universiteti və Boston Kolleci ilə birlikdə apardığı qlobal araşdırmaya daxil ediləcək. Məsələ siyasi mübahisələrə səbəb olub və nəticədə Sosial Demokratlar tərəfindən iş vaxtının azaldılması ilə bağlı təkliflər verəcək işçi qrupu yaradılıb. Bir neçə həmkarlar ittifaqı yeni qanunvericiliyi alqışlasalar da, İsveçin biznes və sənaye sahəsinin nümayəndələri bunun “İsveç iqtisadiyyatı üçün dağıdıcı” olacağını bildiriblər.

"Hesablamalarımız göstərir ki, İsveç 35 saatlıq iş həftəsi tətbiq edərsə, istehsalın 8 faiz, ÜDM-in isə ildə 48 milyard dollar azalmasının şahidi olacağıq”, - deyə İsveç Müəssisələri Konfederasiyasının işəgötürənlərlə iş siyasəti və ictimai rəy şöbəsinin rəhbəri Mattias Dahl xəbərdarlıq edib.

Qeyd edək ki, İsveç 1919-cu ildə 8 saatlıq iş günü və 1973-cü ildə isə 5 günlük iş həftəsi tətbiq edib.