ABŞ Dövlət Xəzinədarlığı bu həftə hərraclarla uzunmüddətli istiqrazlara tələbi yoxlayacaq. ABŞ-ın bu həftə istiqraz satışı fonunda 125 milyard dollar borclanacağı təxmin edilir.

Fins.az xəbər verir ki, ABŞ xəzinə istiqrazları keçən həftə FED inflyasiyanın azalma tempinin qeyri-kafi olduğuna, lakin faiz dərəcələrini artırmaqdansa daha uzun müddət yüksək qalmasının məqsədəuyğun olacağına dair mesaj verdikdən və əmək bazarı göstəricilərinin proqnozların çox altında açıqlanmasından sonra dəyər qazanıb.

İnvestorlar FED sədri Cerom Pavelin faiz artımını istisna etməsinə fokuslanarkən, FED qərarlarına ən həssas olan 2 illik dövlət istiqrazlarının yüksəlişinə səbəb olub. ABŞ-ın 2 illik dövlət istiqrazlarının gəlirlilik faizi keçən həftə təxminən 18 baza bəndi, 10 illik dövlət istiqrazlarının gəlirlilik faizi isə təxminən 16 baza bəndi azalıb.

İnvestorların marağı daha çox qısamüddətli istiqrazlara yönəldiyi halda, ABŞ Xəzinədarlığı bu həftə 42 milyard dollar dəyərində 10 illik istiqrazların və 25 milyard dollarlıq 30 illik istiqrazların hərracı ilə daha uzunmüddətli istiqrazlara tələbi yoxlayacaq. Hökumət həmçinin rüblük geri alma hərracları çərçivəsində üç illik istiqrazlarda 58 milyard dollar satış planlaşdırır. Beləliklə, ABŞ Xəzinədarlığı bu həftə ümumilikdə 125 milyard dollar borclana bilər.

Təxminən 385 milyard dolları idarə edən "Western Asset Management"-in portfel meneceri Mark Lindblum, məşğulluq hesabatı və Pavelin açıqlamalarından sonra 2 və 5 illik istiqrazların daha uzunmüddətli istiqrazları üstələyəcəyini proqnozlaşdırır.

"DWS Americas" da iki illik istiqrazları saxlamağa üstünlük verdiyini, çünki "faiz artımı ehtimalının real görünmədiyini" bəyan edib.