Türkiyə Prezidenti və AK Partiya sədri Rəcəb Tayyib Ərdoğan partiyasının Elazığda keçirdiyi mitinqdə iştirak edib.

Fins.az xəbər verir ki, Ərdoğan buradakı çıxışında iqtisadiyyatla bağlı mesajlar verdi.

Ərdoğan: “İqtisadiyyatımızın təməl sütunları son dərəcə möhkəm, dayanıqlı və güclüdür. Bütün dünyada olduğu kimi, bizim də ən böyük problemimiz inflyasiyanın yaratdığı yüksək yaşayış dəyəridir. Covid-19 epidemiyasının və onun ardınca Rusiya ilə Ukrayna arasında gedən müharibənin iqtisadiyyata mənfi təsirləri davam edir. Bu gün Avropadan Amerikaya qədər hamı müxtəlif addımlar atır və inflyasiyanın qarşısını almaq üçün həll yolları axtarır.

İnflyasiyanın azaldılması bir gecədə baş verəcək bir şey deyil. Üstəlik, dünyanın ümumi tendensiyası bu prosesi çox çətinləşdirir. Türkiyə olaraq məqsədimiz istehsalda, məşğulluqda və ixracda təcil itirmədən, yəni vətəndaşlarımızın ərzağına, çörəyinə və işinə zərər vermədən inflyasiyanı yenidən tək rəqəmli səviyyələrə endirməkdir. İnşallah bir az da səbirli olmaqla bu məqsədə çatarıq. Necə ki, biz uzun illər inflyasiyanı birrəqəmli səviyyədə saxladıq, yenə də eyni səviyyəyə çatacağıq”.

İşçilərə və təqaüdçülərə müraciət edən Ərdoğan, “Vətəndaşlarımızın, xüsusən də işçilərin və təqaüdçülərin problemlərini bilirik. Büdcə imkanlarımızı genişləndirərək pensiyaçılarımızın yükünü yüngülləşdirmək üçün müxtəlif addımlar atmışıq və atırıq. Dövlətimizin gəlirləri artdıqca, inşallah daha çox işlər görəcəyik”.

Günel Məlikzadə
Fins.az