Finss.az - Azərbaycanda dövlət satınalmalarında iştirak edən təchizatçılar, satınalan təşkilatlara məhkumluq barədə arayışları artıq vahid internet portalı vasitəsilə təqdim edəcəklər.

Bu dəyişiklik Nazirlər Kabinetinin 30 dekabr 2023-cü il tarixli qərarına əsasən həyata keçirilir. Qərara əsasən, “İnformasiya resurslarının dövlət satınalmalarının vahid internet portalına inteqrasiyası hədləri” təsdiqlənib və bir sıra dövlət qurumları ilə etender.gov.az portalının inteqrasiyası nəzərdə tutulur.

Dövlət Xidməti və Daxili İşlər Nazirliyi tərəfindən həyata keçirilən layihə çərçivəsində, hüquqi şəxslər və fərdi sahibkarlar, satınalmaya dair elan verilmədən əvvəlki 5 il ərzində məhkumluq barədə məlumatları portala ötürəcəklər. Bu məlumatlar, iqtisadi sahədə cinayətlər, korrupsiya, kibercinayətlər və digər əlaqədar cinayətlərə dair məhkəmə qərarlarını əhatə edəcək.

Yeni inteqrasiya sayəsində, dövlət satınalmalarında iştirak edən təchizatçılar məhkumluq və uyğunluq məlumatlarını birbaşa şəxsi kabinetlərindən sorğu edərək əldə edə biləcəklər. Bu funksiya, arayışların saxtalaşdırılmasının qarşısını alaraq, əlavə vaxt itkisini də azaldacaq.

Rəqəmsal İnkişaf və Nəqliyyat Nazirliyinin İnnovasiya və Rəqəmsal İnkişaf Agentliyinin Milli Məlumat Mübadiləsi Sistemi vasitəsilə məlumatların ötürülməsi təmin ediləcək, kağız sənəd istifadəsi isə minimuma endiriləcək.

Zemfira Ms
Finss.az