Finss.az - “Keşlə bazarı” kimi tanınan ticarət mərkəzində söküntü işlərinin başlanmasına sayılı günlər qalıb. Fevralın 1-nə qədər bazar boşaldılmalıdır. Söküntü işləri Həsən Əliyev küçəsindən Ziya Bünyadov prospektinə paralel olaraq metronun “Koroğlu” stansiyasına qədər yeni avtomobil yolunun tikintisi ilə əlaqədardır.

İllərdir fəaliyyət göstərən “Keşlə bazarı”nın yeni ünvanı hara olacaq? Bu suala cavab verən satıcılar, bazarın Dərnəgüldə yerləşən “Eurohome” tikinti malları bazarında yeni yerə köçürüləcəyini bildiriblər. Hazırda orada bazarın tikintisi davam edir, lakin satıcılar yeni ticarət mərkəzinin inşasının tamamlanması üçün vaxtın kifayət etmədiyini vurğulayıblar.

“Bayrama qədər vaxt verilsəydi, yaxşı olardı. Bu boyda bazar oraya necə yerləşəcək?!” – deyə satıcılar narahatlıqla qeyd ediblər. Yeni bazar ərazisinin adı isə “Yeni Keşlə bazarı” olaraq təyin edilib.

Bu dəyişiklik, ticarət mərkəzinin sakinləri və müştəriləri üçün böyük bir yenilik olacaq. Bazarda fəaliyyət göstərənlər yeni məkanın onlara necə təsir edəcəyini gözləyirlər.