Finss.az - “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nda 2025-ci il üzrə nəzərdə tutulan tədbirlərin icrasının monitorinq və qiymətləndirilmə nəticələrinin müzakirəsi ilə bağlı işçi qrupların iclasları başlayıb. İlk iclas “Sağlam həyat tərzi” İşçi qrupunun üzvləri arasında keçirilib.

“Sağlam həyat tərzi” İşçi qrupunun sədri, səhiyyə nazirinin müavini Nadir Zeynalov bildirib ki, hesabat dövründə icraçı qurumlar tərəfindən Strategiyada nəzərdə tutulan tədbirlərin icrası uğurla davam etdirilib.

İİTKM-in əməkdaşı Sevinc Cabbarova Strategiyanın 2025-ci il üzrə nəzərdə tutulan hədəflərinin icrasına dair monitorinq və qiymətləndirmə hesabatını təqdim edib. O, “Vətəndaşların sağlam həyat tərzi” məqsədinin 7 fəaliyyət istiqamətləri çərçivəsində təsdiq edilmiş 23 tədbirin nəticələri, həmçinin qeydə alınan çağırışları və tövsiyələri diqqətə çatdırıb. Sonra İşçi qrupun üzvləri hesabatla bağlı çıxış ediblər.

İİTKM-in icraçı direktorunun müavini Təranə Salıfova və Mərkəzin Monitorinq və qiymətləndirmə şöbəsinin sektor müdiri Gültac Əhmədzadə-Tapdıqzadə İşçi qrupun üzvləri tərəfindən verilən sualları cavablandırıblar. Həyata keçirilən fəaliyyətlərin effektivliyinin daha da artırılması istiqamətində növbəti dövr üçün əsas addımlar müəyyən edilib.

Qeyd edək ki, “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nda nəzərdə tutulmuş tədbirlərin tam, vaxtında və effektiv icrasını təmin etmək və aidiyyəti dövlət orqanlarının fəaliyyətlərinin əlaqələndirilməsi məqsədilə səkkiz İşçi qrup yaradılıb. “Sağlam həyat tərzi” İşçi qrupunda Səhiyyə Nazirliyi və İİTKM ilə yanaşı, Azərbaycan Respublikasının İqtisadiyyat Nazirliyi, Azərbaycan Respublikası Maliyyə Nazirliyi, Azərbaycan Respublikası Elm və Təhsil Nazirliyi, Azərbaycan Respublikasının Gənclər və İdman Nazirliyi, Ailə, Qadın və Uşaq Problemləri üzrə Dövlət Komitəsi, Azərbaycan Qida Təhlükəsizliyi Agentliyi, İcbari Tibbi Sığorta üzrə Dövlət Agentliyi və TƏBİB-in rəhbər şəxsləri təmsil olunurlar.