SOCAR “Eni S.p.A.” ilə Kot-d’İvuarda “Baleine” neft-qaz yatağı layihəsində 10% iştirak payı əldə edib.

Finss.az xəbər verir ki, saziş Dünya İqtisadi Forumunun 2026-cı il İllik Toplantısı çərçivəsində SOCAR-ın prezidenti Rövşən Nəcəf və “Eni S.p.A.” baş icraçı direktoru Klaudio Deskalzi tərəfindən imzalanıb.

Saziş SOCAR-ın Afrika qitəsində zəngin neft-qaz resurslarına çıxışını təmin edir və şirkətin qlobal genişlənmə strategiyasına uyğun olaraq enerji sənayesində strateji əməkdaşlıq çərçivəsində həyata keçirilir.

“Baleine” yatağı Qərbi Afrikada son illərin ən iri neft-qaz layihələrindən biridir. 2021-ci ildə kəşf edilmiş və 2023-cü ildən hasilata başlayan yataqda hazırda gündəlik 62 min bareldən artıq neft və 2,1 milyon kubmetr qaz hasil edilir. 3-cü mərhələnin işə salınması ilə hasilatın gündəlik 150 min barel neft və 5,7 milyon kubmetr qazə çatdırılması planlaşdırılır.

Xüsusi olaraq qeyd olunur ki, “Baleine” layihəsi Afrikada ilk xalis sıfır emissiyalı dəniz neft-qaz layihəsidir, bu da ekoloji davamlılıq baxımından mühüm əhəmiyyət kəsb edir.

Fuad Mədətov
Finss.az