Finss.az xəbər verir ki, dövlətə məxsus Saudi Aramco şirkətinin açıqlamasına əsasən, Səudiyyə Ərəbistanı fevral ayında bütün bölgələr üzrə alıcılar üçün neft qiymətlərini aşağı salacaq. Qərar qlobal neft bazarlarında tələbat və rəqabət şərtləri fonunda qəbul edilib.

Məlumata görə, Asiya bazarına tədarük edilən əsas növ olan Arab Light xam neftinin qiyməti barel üçün 0,3 dollar azaldılacaq. Beləliklə, bu növün qiyməti Oman/Dubay xam neft səbətindən barel üçün 0,3 dollar baha olacaq.

Digər neft növləri üzrə də qiymət endirimləri nəzərdə tutulur. Asiya bazarı üçün qiymətlər barel üzrə 0,2–0,3 dollar, ABŞ bazarı üçün 0,3–0,4 dollar, Şimal-Qərbi Avropa və Aralıq dənizi regionu üçün isə 0,4 dollar aşağı salınacaq.

Analitiklər hesab edirlər ki, Saudi Aramco-nun bu addımı qlobal neft bazarında rəqabət qabiliyyətini qorumağa və ixrac həcmlərini sabit saxlamağa yönəlib.