“SP Global Ratings” agentliyi Azərbaycan üzrə suveren reytinq proqnozunu “stabil”dən “müsbət”ə dəyişib.

Finss.az agentliyin məlumatına əsasən xəbər verir ki, Azərbaycanın xarici və milli valyutada uzunmüddətli və qısamüddətli suveren kredit reytinqləri “BB+/B” səviyyəsində təsdiqlənib.

Hesabata görə, proqnozun yüksəlməsi Azərbaycan və Ermənistan arasında gərginliyin de-eskalasiya etməsi, sülh sazişi üzrə irəliləyiş və 2026-cı il büdcələrində müdafiə xərclərinin azalması planları ilə bağlıdır. Bu hadisələr mümkün eskalasiya risklərini azaldır, investor etimadını gücləndirə və regional əlaqəliliyin yaxşılaşması hesabına orta müddətli iqtisadi artımı dəstəkləyə bilər.

Agentlik həmçinin vurğulayır ki, Azərbaycan Dövlət Neft Fondu (ARDNF) tərəfindən idarə olunan əhəmiyyətli aktivlər, dövlət sektorunun davamlı xalis aktiv mövqeyi və aşağı dövlət borcu sayəsində fiskal və xarici buferləri qoruyub saxlayır, bu da şokların öhdəsindən gəlmək üçün böyük imkan yaradır.

Hesabatda qeyd olunur ki, 2025-ci il avqustun 8-də ABŞ vasitəçiliyi ilə imzalanmış birgə bəyannamə Azərbaycan və Ermənistanın qarşılıqlı tanınma, ərazi iddialarından imtina, sərhədin sürətləndirilmiş demarkasiyası və regional nəqliyyat marşrutlarının bərpası öhdəliklərini təsbit edib. Bu sənəd son onilliklərdə münasibətlərdə ən konstruktiv mərhələ olub və artıq nəzərəçarpacaq nəticələr verməyə başlayıb.

Hesabatda bildirilir ki, 2025-ci ilin noyabrında təqribən 1 000 ton Qazaxıstan buğdası daşıyan qatar 30 ildən artıq fasilədən sonra ilk dəfə Azərbaycan ərazisindən Ermənistana tranzit keçib. Hər iki hökumət 2026-cı il büdcələrində müdafiə xərclərini azaltmağı planlayır. Bu meyllər davamlı olarsa, investor etimadı güclənə, investisiya mühiti yaxşılaşa və Cənubi Qafqazda daha dərin ticarət və nəqliyyat inteqrasiyası hesabına orta müddətli artım potensialı artacaq.

Fuad Mədətov
Finss.az