“Cənub Qaz Dəhlizi” QSC-nin qaz nəqli seqmentindən əldə etdiyi EBITDA həcminin sabit qalacağı gözlənilir.

Finss.az Fitch-in hesabatına əsasən xəbər verir ki, bu seqment gəlirlərin yüksək proqnozlaşdırıla bilməsi ilə seçilir, çünki qaz tədarükləri uzunmüddətli sazişlərlə təmin olunub.

“Holdingin qaz nəqli seqmenti gəlirlərin yüksək proqnozlaşdırıla bilməsi ilə seçilir, çünki bu gəlirlər qiymət indeksasiyası mexanizmlərinə malik uzunmüddətli nəql sazişləri ilə təmin olunur. TANAP və TAP üzrə qaz tədarükləri ‘ship-or-pay’ prinsipi ilə həyata keçirilir ki, bu da həcmlərin dəyişməsi riskini demək olar ki, aradan qaldırır. Biz hesab edirik ki, qaz nəqli üzrə EBITDA həcmi mütləq ifadədə sabit qalacaq və ümumi EBITDA-da payı tədricən artaraq 2027-ci ildə təxminən 80%-ə çatacaq, halbuki bu göstərici 2024-cü ildə təxminən 60% idi,” – deyə hesabatda qeyd olunub.

Eyni zamanda, şirkətin upstream-seqmenti “Şahdəniz” yatağının ehtiyatlarının azalması və qaz-neft qiymətlərindən asılılıq səbəbindən təzyiq altındadır. Fitch-in proqnozuna görə, upstream-seqment üzrə EBITDA 2025–2028-ci illərdə tədricən azalacaq və ümumi EBITDA-dakı payı 2024-cü ildəki təxminən 40%-lə müqayisədə daha da enəcək. Bu, hasilatın gözlənilən azalması və Brent və TTF qiymətlərinin düşməsi ilə bağlıdır.

Fuad Mədətov
Finss.az