Kiçik və Orta Biznesin İnkişafı Agentliyi (KOBİA) yerli investorların startap ekosistemində diqqət yetirdikləri sahələri açıqlayıb.

Bu barədə Finss.az-ın sorğusuna cavab olaraq KOBİA-dan məlumat verilib.

Agentliyin məlumatına görə, yerli investorlar daha çox real bazar ehtiyaclarını qarşılayan, kommersiya potensialı yüksək olan startaplara maraq göstərirlər.

KOBİA vurğulayıb ki, investorların prioritet sahələri arasında biznes proseslərinin optimallaşdırılması və xidmət keyfiyyətinin artırılması xüsusi yer tutur:

“Xüsusilə biznes proseslərinin avtomatlaşdırılması, müştəri təcrübəsinin rəqəmsallaşdırılması və xidmət keyfiyyətinin artırılmasına yönəlmiş həllər diqqət mərkəzindədir.”

Açıqlamada qeyd olunub ki, texnologiya əsaslı layihələrə maraq artmaqdadır:

“İT infrastrukturu, proqram təminatı və süni intellekt tətbiqlərinə əsaslanan yerli texnoloji layihələrə maraq getdikcə artır.”

Bundan əlavə, kənd təsərrüfatı və istehsal sahələrində innovativ həllər də diqqət çəkir:

“Bununla yanaşı, kənd təsərrüfatında rəqəmsal idarəetmə, logistik zəncirlərin optimallaşdırılması və istehsal yönümlü innovativ həllər də yeni trendlər sırasındadır.”

Agentlik həmçinin sosial yönümlü layihələrə marağın əhəmiyyətini vurğulayıb:

“Təhsil, sağlam həyat tərzi və sosial yönümlü layihələrə olan investor marağı isə ekosistemin daha balanslı şəkildə inkişafını təmin edir.”

Nəticə olaraq, KOBİA yerli bazarda investorların prioritetlərini belə yekunlaşdırır:

“Qeyd edə bilərik ki, yerli bazarda praktik, dayanıqlı və ixrac potensialı olan startaplara üstünlük verildiyi müşahidə olunur.”

Fuad Mədətov
Finss.az