Finss.az xəbər verir ki, Monqolustan mediasının məlumatına əsasən hökumət bir sıra iri dövlət şirkətlərinin, o cümlədən Mongolian Airlines (Monqolustan Hava Yolları) və Toriin Bank səhm paketlərinin 10%-dən 51%-ə qədərini özəlləşdirmək niyyətindədir.

Monqolustan hökuməti bildirir ki, dövlət və özəl sektor arasında rəqabətin pozulmaması və şirkətlərin səmərəliliyinin artırılması üçün dövlət müəssisələrinin idarəetməsi yenidən qurulmalıdır. Media nümayəndələrinin vurğuladığı kimi, korrupsiya, maliyyə mənimsəmələri və qeyri-şəffaflıq dövlət şirkətlərində ən ciddi problemlər olaraq qalır.

Özəlləşdirmənin məqsədi bu müəssisələrdə idarəetməni açıq, hesabatlı və şəffaf etmək, eyni zamanda bazar rəqabətini gücləndirməkdir.

Hazırda oxşar yanaşma Monqolustanın ən iri şirkətlərindən biri — Tavan Tolqoy kömür yatağını idarə edən Erdenes Tavan Tolqoy ASC üzərində də tətbiq olunur.

Bununla yanaşı, Mongolian Airlines və Toriin Bankdan savayı, hökumət bir neçə dövlətə məxsus elektrik paylayıcı şirkətlərinin və digər strateji müəssisələrin də özəlləşdirilməsini planlaşdırır.

Monqolustanın bu addımı ölkədə iqtisadi islahatların yeni mərhələsi kimi qiymətləndirilir və investorlar üçün yeni imkanlar açacağı gözlənilir.