Finss.az xəbər verir ki, “Mitsubishi Power Ltd.” şirkətinin prezidenti Takao Tsukui, təbii qazdan elektrik enerjisi istehsal edən turbinlərə tələbin yaxın illərdə əhəmiyyətli dərəcədə artacağını bildirib.

Şirkət rəhbərinin sözlərinə görə, ABŞ və Yaxın Şərq bazarlarında artan enerji tələbi fonunda 2025-ci ildə Mitsubishi Power müştəriləri ümumi gücü 70 QVt-dan çox olan turbinlər sifariş edəcək. Bu göstərici 2024-cü ildəki təxminən 57 QVt-lıq həcmlə müqayisədə 20%-lik artım deməkdir.

Ekspertlər qeyd edirlər ki, qlobal enerji bazarında təbii qazla çalışan elektrik stansiyalarına marağın artması, bərpa olunan enerji mənbələrinin qeyri-sabitliyi və enerji təhlükəsizliyi ilə bağlı narahatlıqlar səbəbindən baş verir.

“Mitsubishi Power” hal-hazırda hibrid enerji sistemləri və yüksək səmərəli qaz turbinləri texnologiyalarının inkişafına diqqət yetirir və bu seqmentdə lider mövqeyini qorumağı hədəfləyir.