Finss.az xəbər verir ki, Almaniyanın aparıcı kimya şirkətlərindən biri olan BASF, örtüklər (Coatings) bölməsindəki əsas səhmlərini ABŞ-ın Carlyle investisiya şirkətinə və onun strateji tərəfdaşı olan Qatar İnvestisiya Təşkilatı (QIA)-ya satacaq.

BASF-in rəsmi press-relizinə əsasən, bu strateji satış nəticəsində sözügedən biznesin dəyəri 7,7 milyard avro səviyyəsində qiymətləndirilir. Şirkət əməliyyatdan vergilərdən əvvəl 5,8 milyard avro gəlir əldə edəcək.

Sövdələşmənin başa çatmasından sonra BASF bu bölmədə 40%-lik payı özündə saxlayacaq, yəni tamamilə bazardan çıxmır, lakin idarəetməni yeni tərəfdaşlara ötürür.

BASF Coatings — avtomobil sənayesindən tutmuş plastik, metal və şüşə örtüklərinə qədər geniş sahələr üçün innovativ və davamlı örtük materialları istehsal edən qlobal miqyaslı bir biznesdir. Şirkət Avropa, Şimali və Cənubi Amerika, eləcə də Asiya-Sakit okean regionunda fəaliyyət göstərir.

2024-cü ildə BASF Coatings bölməsinin illik gəliri təxminən 3,8 milyard avro təşkil edib.

Bu satış, BASF-in öz əsas biznes istiqamətlərinə fokuslanmaq, kapitalın optimallaşdırılması və qlobal bazarda çevikliyin artırılması məqsədi daşıyan strategiyasının bir hissəsidir.