Finss.az xəbər verir ki, ABŞ Ticarət Departamenti Çin, Türkiyə və Birləşmiş Ərəb Əmirliklərindən (BƏƏ) olan bir neçə şirkətə qarşı ixrac məhdudiyyətləri tətbiq edib. Vaşinqton bu şirkətlərin fəaliyyətinin ABŞ-ın milli təhlükəsizliyinə və xarici siyasət maraqlarına təhdid yaratdığı qənaətinə gəlib.

Rəsmi açıqlamaya görə, məhdudiyyətlər əsasən Çin mənşəli olmaqla ümumilikdə 26 şirkətə şamil olunur. ABŞ Ticarət Nazirliyi bəyan edib ki, bu qurumların hərəkətləri milli təhlükəsizlik və siyasi maraqlara zidd hesab olunur.

Bu qərar ABŞ-ın beynəlxalq ticarət siyasətində sərt xətt yürütməsinin davamı olaraq qiymətləndirilir və xüsusilə texnologiya ixracı, strateji məhsulların yayılması və kiber təhlükəsizlik riskləri kimi sahələrdə ciddi nəzarətin artdığını göstərir.

Qeyd edək ki, ABŞ-ın ixrac nəzarəti siyasəti son illərdə Çinlə ticarət münaqişələri, təhlükəsizlik narahatlıqları və geosiyasi gərginliklər fonunda daha da sərtləşib. Bu məhdudiyyətlər həmin şirkətlərin ABŞ-dan yüksək texnologiyalı məhsullar almasını və istifadə etməsini məhdudlaşdırır.