Finss.az xəbər verir ki, ABŞ-ın Serbiyanın NIS şirkətinə qarşı sanksiyalar tətbiq etməsindən sonra Macarıstanın enerji nəhəngi MOL, Serbiyaya yanacaq tədarükünü artırmağa hazır olduğunu açıqlayıb. Bu barədə Macarıstanın xarici işlər naziri Péter Szijjártó “Tanjug” xəbər agentliyinə müsahibəsində bildirib.

Nazir vurğulayıb ki, MOL şirkəti Serbiyanın neft və yanacaqla təchizatında mühüm rol oynayır:

“Serb dostlarımız MOL şirkətindən artan tədarüklərə arxalana bilərlər. Lakin bu artım, Xorvatiyadan gələn neft tədarükündəki boşluğu tam şəkildə kompensasiya etməyəcək.”

Qeyd edək ki, oktyabrın 9-da Xorvatiyanın JANAF (Adriatik Neft Boru Kəməri operatoru) şirkəti, ABŞ sanksiyalarına məruz qalan NIS (Naftna Industrija Srbije) şirkətinə neft tədarükünü dayandırdığını açıqlamışdı. JANAF bildirir ki, Serbiya şirkəti ABŞ tərəfindən tələb olunan lisenziyanı təqdim etmədiyindən, müqavilə 8 oktyabr 2025-ci ildən etibarən icra edilə bilməz.

Şirkət əlavə edib ki, Xorvatiya hökuməti və ABŞ-dakı hüquq məsləhətçiləri ilə birgə mümkün həll yolları axtarmağa davam edirlər.

MOL tərəfindən atılacaq əlavə addımlar, Serbiyanın enerji təhlükəsizliyini qorumaq baxımından mühüm əhəmiyyət daşıyır.