Finss.az xəbər verir ki, Pakistanın Neft və Qaz naziri Əli Pervaiz Malik, Sankt-Peterburq Beynəlxalq Qaz Forumu (SPIGF‑2025) çərçivəsində keçirilən plenar sessiyada çıxış edərək ölkəsinin neft və qaz sektorunun inkişafında Rusiya da daxil olmaqla beynəlxalq tərəfdaşların dəstəyinə ümid etdiyini bildirib.

Nazir qeyd edib ki, Pakistan həm quruda, həm də dənizdə yerləşən neft və qaz yataqlarının potensialını reallaşdırmaq üçün xarici investisiyalara və texnoloji tərəfdaşlıqlara ehtiyac duyur. O, xüsusilə Rusiya və "Gazprom" kimi təcrübəli enerji şirkətlərinin Pakistanın enerji sektoruna töhfə verməsinin vacibliyini vurğulayıb.

"Baş nazir və hökumətimiz, qaz bazarımızda dost və qardaş ölkələrlə əməkdaşlıq etməyə hazırdır. Biz ölkənin geoloji potensialından tam istifadə etməyə və yeni yataqları istismara verməyə köklənmişik", – deyə Əli Pervaiz Malik bildirib.

Pakistan hökuməti enerji asılılığını azaltmaq, yerli ehtiyatlardan səmərəli istifadə etmək və enerji təhlükəsizliyini təmin etmək məqsədilə kəşfiyyat və hasilat sahəsində beynəlxalq əməkdaşlığa xüsusi önəm verir. Bu kontekstdə Rusiya ilə mümkün əməkdaşlıq ölkənin enerji strategiyasında mühüm yer tutur.