Finss.az xəbər verir ki, Yaponiyanın aparıcı qida və içki istehsalçısı Asahi Group Holdings, keçən həftə baş verən kiberhücumun təsirlərini qismən aradan qaldıraraq, ölkədə pivə istehsalını və tədarükünü bərpa etdiyini açıqlayıb. Bu barədə Wall Street Journal nəşri şirkət nümayəndəsinə istinadən məlumat yayıb.

Asahi Group bildirir ki, oktyabrın 2-dən etibarən ölkə üzrə altı fabrikdə pivə və digər içkilərin istehsalı və bazara tədarükü yenidən işə salınıb. Kiberhücumun səbəbləri və texniki detalları açıqlanmasa da, insident şirkətin daxili sistemlərinə ciddi təsir göstərib.

Kiberhücum nəticəsində Asahi-nin istehsal və logistika prosesləri müvəqqəti dayanmışdı, bu da Yaponiyada pivə məhsullarının çatdırılmasına birbaşa təsir etmişdi. Şirkət hadisənin miqyasını və müştərilərə təsirini minimuma endirmək üçün fövqəladə tədbirlər görüb.

Asahi Group kiberhücumdan sonra kibertəhlükəsizlik strategiyasını gücləndirmək, sistemlərini daha dayanıqlı hala gətirmək üçün əlavə investisiya planları üzərində işləyir.