Finss.az xəbər verir ki, ABŞ-ın aviasiya nəhəngi Boeing şirkəti populyar 737 MAX modelini əvəz edəcək yeni dar gövdəli təyyarə üzərində işləməyə başlayıb.

Nəşrin sənaye mənbələrinə əsasən, 2025-ci ilin əvvəlində Boeing-in baş direktoru Kelli Ortberq bu layihə ilə bağlı İngiltərədə “Rolls-Royce Holdings” şirkətinin nümayəndələri ilə yeni mühərriklərin istehsalı məsələsini müzakirə edib.

Qeyd olunur ki, mülki aviasiya seqmentində yeni nəsil təyyarənin hazırlanması üçün artıq məhsulun inkişafı üzrə yeni rəhbər də təyin olunub. Bu addım, Boeing-in gələcək texnoloji inkişaf planlarının və Airbus ilə rəqabətinin bir hissəsi kimi qiymətləndirilir.

Yeni modelin daha səmərəli yanacaq sərfiyyatı, az karbon emissiyası və yüksək texnoloji təhlükəsizlik standartlarına cavab verməsi gözlənilir.

Boeing, hazırda 737 MAX seriyasının təhlükəsizlik və texniki problemləri səbəbindən dünya üzrə bir sıra tənzimləyici orqanların ciddi nəzarəti altındadır. Yeni nəsil təyyarə layihəsi bu reputasiya problemlərini aradan qaldırmaq və bazarda mövqeyini möhkəmləndirmək məqsədi daşıyır.