2025-ci il iyunun 30-na olan vəziyyətə görə, Beynəlxalq Maliyyə Korporasiyasının (IFC) energetika sahəsində ümumi portfeli 6,7 milyard dollara çatıb.

Finss.az xəbər verir ki, bunu IFC-nin Avropa-Cənubi Qafqaz üzrə infrastruktur sahəsində investisiya meneceri Vyaçeslav Qordiyenko “Azərbaycan-Mərkəzi Asiyanın Yaşıl Enerji Həftəsi” tədbirində bildirib.

O qeyd edib ki, IFC-nin strategiyasının mərkəzində “yaşıl enerji”nin inkişafı və iş yerlərinin yaradılması dayanır ki, bu da birbaşa Azərbaycan və regionla bağlıdır.

Vyaçeslav Qordiyenko bildirib ki, IFC problemləri deyil, imkanları görür və erkən mərhələdə layihələrə qoşulmaq vacibdir ki, onlar bank sektoruna uyğun olsun və gələcəkdə maliyyələşmə əldə edə bilsinlər.

Onun sözlərinə görə, IFC iki formatda işləyir:

1. Əməkdaşlıq formatı: Daha yetkin layihələrdə yüngül dəstək göstərilir, məsələn, layihə sənədlərinin və maliyyə modellərinin təhlili. Bu razılaşmalar adətən 100–500 min dollar, maksimum isə 1 milyon dollar həcmində olur. Məsələn, Gürcüstanda günəş və külək layihəsi üzrə bir inkişaf etdiriciyə hökumətlə danışıqlarda və CFD modelinin təhlilində kömək göstərilib. Bu layihələr yarım ildən bir ilə qədər davam edir.

2. Birgə işlənmə formatı: Daha mürəkkəb və innovativ layihələrdə IFC erkən mərhələdə həmmüvəqqəti investor qismində çıxış edir. Burada məbləğlər 8 milyon dollara qədər çata və müddət 1–2 il və daha uzun ola bilər. Adətən bu pilot layihələr və ya “yaşıl sahə” layihələridir, məsələn, Polşada hidrogen və ya Ukraynada enerji saxlama obyektləri sahəsində.

Qordiyenko vurğulayıb ki, IFC-nin yanaşması regionda yaşıl enerji layihələrinin inkişafına və investisiya imkanlarının artırılmasına yönəlib.