Federal Ehtiyatlar Sisteminin (FED) İdarə Heyətinin üzvü Stiven Miran bildirib ki, Donald Tramp administrasiyası tərəfindən əksər ölkələrdən idxal olunan məhsullara tətbiq edilən gömrük rüsumları ABŞ-da inflyasiyanın artımına ciddi təsir göstərməyib.

Miran CNBC-yə verdiyi açıqlamada qeyd edib: "Mən tariflərin inflyasiyaya əhəmiyyətli təsir etdiyini görmürəm. Belə sübutlar yoxdur." O, ABŞ-da inflyasiya ilə bağlı narahatlıqların daha çox daxili iqtisadi amillərlə bağlı olduğunu vurğulayıb.

Stiven Miran eyni zamanda, FED-in Çərşənbə günü qəbul etdiyi 25 baza bəndlik faiz endirimini dəstəkləməyib və daha böyük – 50 baza bəndi həcmində kəsintinin vacib olduğunu bildirib. Bu qərara qarşı səs verən yeganə FOMC üzvü kimi, o, daha aqressiv pul siyasətini müdafiə edib.