Finss.az xəbər verir ki, NASA, Northrop Grumman şirkətinə məxsus Cygnus CRS-23 yük gəmisinin Beynəlxalq Kosmik Stansiyaya (ISS) planlaşdırılan qoşulmasının əsas mühərrik nasazlığı səbəbilə təxirə salındığını elan edib.

Məlumata görə, Cygnus XL yük gəmisinin əsas mühərriki 16 sentyabr tarixində orbitin qaldırılması üçün həyata keçirilən ikinci mühərrik yanmasından sonra vaxtından əvvəl avtomatik olaraq sönüb. Bu səbəbdən 17 sentyabra planlaşdırılmış docking əməliyyatı həyata keçirilməyib.

NASA bildirib ki, kosmik gəminin digər sistemləri tam funksional vəziyyətdədir. Hazırda Mission Control alternativ yanma planı üzərində işləyir və yeni docking tarixi yaxın günlərdə açıqlanacaq.

 Cygnus CRS-23 missiyası NASA ilə Northrop Grumman arasında imzalanmış kommersiya təchizatı müqaviləsi çərçivəsində həyata keçirilir. Missiyanın əsas məqsədi ISS-ə təxminən 5 ton yük – o cümlədən ərzaq, texniki avadanlıq və elmi tədqiqat materialları çatdırmaqdır.

Bu, həm də Cygnus yük gəmisinin yeni və daha böyük versiyası olan Cygnus XL-in ilk uçuşudur. Plana əsasən, gəmi 2026-cı ilin martına qədər ISS-də qalmalıdır.

NASA texniki problemi analiz etməyə davam edir və təhlükəsizlik və missiyanın uğuru üçün bütün ehtiyat tədbirlərinin görüldüyünü vurğulayır.