Finss.az xəbər verir ki, çərşənbə axşamı ABŞ fond indeksləri, investorların Federal Ehtiyat Sisteminin (FED) sentyabr iclasının nəticəsini gözlədiyi və ABŞ iqtisadi göstəricilərini qiymətləndirdiyi şəraitdə bir qədər azalma ilə bağlanıb.

FED-in faiz qərarı bu gün axşam saatlarında açıqlanacaq. CME FedWatch platformasına görə, bazar iştirakçılarının 96%-i növbəti faiz azaldılmasını, 25 baza bəndi səviyyəsində kəsilməni gözləyir. Lakin 50 baza bəndi azalma ehtimalı çox aşağı qiymətləndirilir.

Bank of America-nın baş strateqi Maykl Hartnett qeyd edir ki, qlobal səhmlər yaxın dövrdə iqtisadi artım gözləntiləri ilə toparlanmağa davam edəcək. BofA-nın sorğusuna görə, fond menecerlərinin 28%-i aktivlərini artırıb, investorların yalnız 16%-i iqtisadi zəifləmə gözləyir. Respondentlərin təxminən yarısı isə FED-dən növbəti 12 ayda 4 və ya daha çox faiz endirimi gözləyir.

Digər tərəfdən, ABŞ-da pərakəndə satışlar avqustda 0,6% artaraq gözləntiləri üstələyib. Trading Economics analitikləri cəmi 0,2% artım proqnozlaşdırmışdılar.