Finss.az xəbər verir ki, Britaniyanın aparıcı mobil operatoru Vodafone Group Plc, Avropa Futbol Assosiasiyaları İttifaqı (UEFA) ilə böyük strateji tərəfdaşlıq sazişi imzalayıb. Müqaviləyə əsasən, şirkət 2025-26 və 2026-27 mövsümlərində UEFA Çempionlar Liqasının rəsmi telekommunikasiya tərəfdaşı olacaq.

Tərəfdaşlıq həm kişi, həm də qadın futbolu daxil olmaqla UEFA-nın müxtəlif turnirlərini əhatə edir. Bu əməkdaşlıq Vodafone-un Avropadakı idman sponsorluğu strategiyasında mühüm dönüş nöqtəsi hesab olunur.

Şirkətin mətbuat xidmətindən verilən məlumata görə, gələn həftə başlayacaq turnirin başlanğıcı ilə əlaqədar olaraq, Champions Travel eSIM adlı yeni proqram istifadəyə veriləcək. Bu proqram sayəsində azarkeşlər dünyanın 206 ölkəsinə səyahət etmək üçün elektron SİM kart (eSIM) əldə edə biləcəklər. Bundan əlavə, Çempionlar Liqasının oyunlarına biletlər bu proqram istifadəçiləri arasında hədiyyə olaraq oynanılacaq.

Vodafone-un sponsorluq fəaliyyəti yalnız kişi futbolu ilə məhdudlaşmır. Şirkət eyni zamanda:

• 2030-cu ilə qədər UEFA Qadınlar Çempionlar Liqasının,

• 2029-cu il UEFA Qadınlar Avropa Çempionatının,

• və qarşıdakı beş il ərzində digər qadın futbol turnirlərinin də rəsmi sponsoru olacaq.

Bu təşəbbüs Vodafone-un bərabər hüquqların təşviqi və qadın idmanının inkişafına dəstəyi kimi sosial məsuliyyət məqsədlərinə də uyğundur.