Finss.az xəbər verir ki, OpenAI və Nvidia Corp. rəhbərləri Sam Altman və Censen Huanq gələn həftə Böyük Britaniyada keçirməyi planlaşdırdıqları səfər zamanı ölkədə məlumat mərkəzlərinə milyardlarla dollar investisiya vəd edəcəklər.

Məlumatlara görə, OpenAI və Nvidia, layihəni həyata keçirmək üçün Britaniyanın məlumat mərkəzi operatoru Nscale Global Holdings Ltd ilə əməkdaşlığa başlayıb. Xüsusilə OpenAI bu təşəbbüsə bir neçə milyard dollar həcmində sərmayə qoymağı planlaşdırır.

Qeyd edək ki, 2024-cü ildə yaradılmış Nscale şirkəti üç il ərzində Böyük Britaniyada məlumat mərkəzlərinin tikintisinə 2,5 milyard dollar investisiya yatıracağını açıqlayıb. Yanvar ayında şirkət, Essexdə 45.000-dək qabaqcıl Nvidia GB200 çipindən istifadə olunacaq süni intellekt inkişafına yönəlik nəhəng məlumat mərkəzinin inşasını elan etmişdi.

Altman və Huanq ABŞ prezidenti Donald Trampla eyni vaxtda Böyük Britaniyaya səfər edəcək Amerika şirkətlərinin rəhbərlərindən ibarət nümayəndə heyətinin tərkibində yer alacaqlar. Mənbələr bildirirlər ki, nümayəndə heyətinə müxtəlif sahələrdən olan top-menecerlər daxildir və səfər zamanı on milyardlarla dollar dəyərində yeni investisiya layihələri elan olunacağı gözlənilir.

Bu layihə Böyük Britaniyanın süni intellekt infrastrukturu və rəqəmsal transformasiyası baxımından strateji əhəmiyyət daşıyır və ölkənin AI mərkəzi kimi qlobal mövqeyini daha da gücləndirə bilər.