Finss.az xəbər verir ki, Macarıstanın xarici işlər naziri Peter Szijjarto sosial media hesabında açıqlama verərək Shell ilə bağlanan 10 illik qaz müqaviləsini ölkənin enerji təhlükəsizliyi baxımından strateji addım kimi qiymətləndirib. Müqaviləyə əsasən, 2026-cı ildən etibarən Shell hər il Macarıstana 2 milyard kubmetr təbii qaz tədarük edəcək.

Nazir bildirib ki, bu razılaşma Qərb qaz tədarükçüsü ilə imzalanmış ən böyük və ən uzunmüddətli müqavilədir. Szijjarto həmçinin vurğulayıb ki, Shell ilə tərəfdaşlıq Macarıstana yeni tədarük mənbələri cəlb etməyə və qaz balansını şaxələndirməyə imkan verəcək.

O qeyd edib ki, şərq tədarükçüləri ilə uzunmüddətli müqavilələr ölkənin enerji təhlükəsizliyinin əsas sütunlarından biri olaraq qalır. Bu müqavilə Macarıstanın enerji bazarındakı diversifikasiya siyasətinin mühüm hissəsi kimi qiymətləndirilir.