2025-ci ilin iyun ayında Azərbaycan Dövlət Neft Şirkətinə (SOCAR) məxsus STAR neft emalı zavodu, Türkiyədə 133 963 ton nafta istehsal edib. Bu göstərici 2024-cü ilin iyun ayı ilə müqayisədə 88 792 tondan 45 171 ton və ya 50,9 faiz artım deməkdir.

Bu barədə Finss.az Türkiyənin Enerji Bazarlarının Tənzimlənməsi Qurumunun (EPDK) məlumatlarına istinadən xəbər verir.

Qeyd edək ki, nafta neftin yüngül fraksiyalarından olub, əsasən benzin və kerosin kimi məhsulların alınmasında istifadə edilir. Yəni nafta dedikdə neftin distillə prosesi ilə əldə olunan yüngül maye yanacaq nəzərdə tutulur.

STAR Neft Emalı Zavodu 2018-ci il oktyabrın 19-da fəaliyyətə başlayıb və neft emalı ilə neft-kimya sənayesinin inteqrasiyasını təmin edir. Zavod Türkiyədə real sektora yatırılan ən böyük investisiya layihələrindən biridir. 2024-cü ilin sonundan zavodun illik neft emalı gücü 13 milyon tona çatıb. STAR dizel, nafta, təyyarə yanacağı və digər neft məhsullarını istehsal edir və 2023-cü ildə Türkiyənin emal olunmuş neft məhsullarına tələbatının təxminən 18 faizini qarşılayıb. İllik nafta istehsalı isə Petkim neft-kimya kompleksinin xammal tələbatını demək olar ki, tam ödəyir.

Fuad Mədətov
Finss.az