Finss.az xəbər verir ki, Pekin hakimiyyəti mənzil satışını və daşınmaz əmlak sektoruna investisiyaları dəstəkləmək məqsədi ilə şəhər sakinləri üçün şəhərətrafı daşınmaz əmlakın alınmasına qoyulan məhdudiyyətləri aradan qaldırıb.

Bu fonda tərtibatçıların səhmləri əhəmiyyətli dərəcədə bahalaşıb. Belə ki, Bazar ertəsi ticarət zamanı Honq-Konqda Longfor Group və China Resources Land səhmləri 1,7%, Sunac China - 0,7%, Yuexiu Property - 0,4% bahalaşıb.

Pekin yerli sakinlərin şəhərin sərhədi sayılan beşinci nəqliyyat dairəsi yolundan kənarda mənzil almaq limitini qaldırıb. Əvvəllər onlara yalnız iki mülk almağa icazə verilirdi. Çinin Yicai nəşrinə görə, Pekinin qeyri-rezidentləri üçün məhdudiyyətlər qüvvədə qalır.

Ekspertlər hesab edirlər ki, Pekin hakimiyyətinin qərarı bütövlükdə bir neçə ildir tənəzzüldə olan sənayedəki vəziyyətə ciddi təsir göstərə bilməyəcək.

Pinpoint Asset Management-in iqtisadçısı Zhiwei Zhang The Wall Street Journal-a deyib: "Mən bu addımın makroiqtisadi baxımdan vacib olduğunu düşünmürəm, çünki Pekin Çin daşınmaz əmlak bazarının yalnız kiçik bir hissəsini təşkil edir".