Çinin şərqində yerləşən Tzinxua şəhərindən Azərbaycana (Türkmənbaşı limanı vasitəsilə) ilk yük qatarı yola salınıb. Bu, yeni Trans-Xəzər Beynəlxalq Nəqliyyat Dəhlizinin rəsmi açılışı kimi qeyd olunur.

Finss.az-ın Türkmənistanın Nəqliyyat və Kommunikasiya Agentliyinə istinadən məlumatına görə, qatar 100 standart konteynerdən ibarət heyətlə yola düşüb. Daşınan məhsullar arasında geyim, aksessuarlar, metal ehtiyat hissələri və digər mallar var. Türkmənbaşı limanına çatdıqdan sonra yüklər dəniz vasitəsilə Azərbaycanın Bakı limanına göndəriləcək.

Yeni marşrut Çin-Qazaxıstan sərhədində yerləşən Xorqos gömrük-keçid məntəqəsi, həmçinin Almatı, Daşkənd və Aşqabad kimi böyük şəhərlərdən keçir.

Bu marşrutun istifadəyə verilməsi Aktau–Bakı logistika xəttinin yük yükünü azaldacaq və Çin məhsullarının Mərkəzi Asiya ilə Mərkəzi-Şərqi Avropa bazarlarına daha sürətli çatdırılmasını təmin edəcək.

Qeyd edək ki, bu, Çjetszyan vilayəti tərəfindən “Çin–Avropa” təşəbbüsü çərçivəsində təşkil olunan 26-cı beynəlxalq dəmir yolu xəttidir.

Avropa İttifaqı da Türkmənbaşının limanına böyük önəm verir. Türkmənistana səfəri zamanı Avrokomissar Yozef Sikela limanı Avropa ilə Asiyanı birləşdirən əsas qovşaq kimi qiymətləndirib və bildirib:
“Bu dəhliz yüklərin Avropaya çatdırılma vaxtını təxminən 15 günə endirəcək, yeni iş yerləri və investisiya imkanları yaradacaq.”