Finss.az - Azərbaycan Dövlət Neft Şirkəti (SOCAR) ilə Almaniyanın dövlət enerji şirkəti SEFE (Securing Energy for Europe) arasında təbii qaz alışı üzrə 10 illik strateji müqavilə imzalanıb.

Sənədə əsasən, SOCAR Avropada SEFE-nin ehtiyaclarını qarşılayacaq şəkildə təbii qaz tədarükünü təmin edəcək.

Müqavilənin şərtlərinə əsasən, illik qaz tədarük həcmi mərhələli şəkildə artırılaraq 15 teravatt-saat (TWh), yəni təxminən 1,5 milyard kubmetrə (bcm) çatdırılacaq. Bu əməkdaşlıq qaz hasilatı və infrastrukturun, o cümlədən qaz kompressorlarının inkişafı sahəsində investisiyaların dəstəklənməsini nəzərdə tutur. Nəticədə, Avropaya daha çox boru xətti qazı çatdırılması mümkün olacaq və bu, qitənin enerji təhlükəsizliyinin gücləndirilməsinə mühüm töhfə verəcək.

SEFE-nin baş icraçı direktoru Egbert Laege bildirib ki, bu uzunmüddətli müqavilə Almaniya ilə Azərbaycan arasında mövcud olan güclü əməkdaşlığın əyani nümunəsidir:
"Bu tərəfdaşlıq Avropaya əhəmiyyətli həcmdə təbii qaz çatdırmaq üçün yeni marşrutun formalaşmasına səbəb olacaq. Bu isə bizim enerji portfelimizin şaxələndirilməsi və müştərilərimizin enerji təchizatının təhlükəsizliyinin artırılması istiqamətində vacib addımdır."

SOCAR-ın prezidenti Rövşən Nəcəf isə vurğulayıb ki, bu razılaşma SOCAR-ın Avropanın enerji təhlükəsizliyinin gücləndirilməsi istiqamətində atdığı növbəti mühüm addımdır:
"SEFE-yə etibarlı və iri həcmdə təbii qaz tədarük etməklə, biz Azərbaycan ilə Almaniya arasında mövcud olan tərəfdaşlığı daha da möhkəmləndiririk. Bu həm Avropanın enerji mənbələrinin şaxələndirilməsi, həm də dayanıqlı inkişaf hədəflərinə dəstəkdir. SOCAR bundan sonra da hasilat və infrastruktur sahəsində layihələrə sərmayə yatıraraq tərəfdaşlarımıza fasiləsiz və təhlükəsiz enerji təchizatının təmin edilməsini davam etdirəcək."

Bu yeni əməkdaşlıq həm Azərbaycan, həm də Avropa üçün enerji sahəsində strateji əhəmiyyətə malikdir və qlobal enerji bazarlarında stabilliyin təmin olunmasına önəmli töhfə verəcək.