Ötən il Azərbaycanda dövlət büdcəsinə əmlak vergisi üzrə ödənişlərlər bağlı 364,7 mln. manat müəyyən edilmiş proqnoz 338,5 mln. manat icra edilib.

Finss.az xəbər verir ki, bu “Azərbaycan Respublikasının 2024-cü il dövlət büdcəsinin icrası haqqında” Azərbaycan Respublikasının Qanun layihəsinə və “2024-cü il dövlət büdcəsinin icrasına dair illik hesabata” Hesablama Palatasının rəyində qeyd edilib.

Bildirilib ki, əvvəlki illə müqayisədə kəsir 1,1 faiz bəndi artaraq 6,1%-dən 7,2%-ə qalxıb. Vergi orqanının hesabatlarına əsasən, 2024-cü ildə hüquqi şəxslərin əmlak vergisi üzrə hesablanmış real öhdəliklərin 2023-cü ilə nisbətən 19,1 mln. manat və ya 5,6% artmaqla 364,2 mln. manata yüksəlməsi və real hesablamanın proqnozla demək olar ki, eynilik təşkil etməsi şəraitində 2024-cü il dövlət büdcəsinin icrasına dair illik hesabatda da qeyd edildiyi kimi proqnozdan az daxilolma qeyri neft-qaz sektoru üzrə hesablanmış əmlak vergisinin tam həcmdə yığımının həyata keçirilməməsi ilə əlaqədar olub. Belə ki, qeyri neft-qaz sektoru üzrə əmlak vergisində 282,6 mln. manat hesablama olduğu halda, onun yalnız 78%-nin dövlət büdcəsinə ödənilməsi təmin edilmiş, ümumi proqnozun icra faizinə neft-qaz sektorunda real hesablamadan 44,9% və ya 36,6 mln. manat artıq olmaqla 118,2 mln. manat məbləğində vəsaitin daxil olması öz təsirini göstərib.

Qeyri neft-qaz sektorunun dövlət mülkiyyətinə aid müəssisələrinin büdcəyə ödənişlərinin real hesablamaların 81,8%-ni təşkil etməsi şəraitində, “Azərbaycan Hava Yolları” QSC üzrə bu göstərici 3,3% və ya 20,4 mln. manat hesablamaya qarşı 0,7 mln. manat, “Bakı Metropoliteni” QSC üzrə 0,6 mln. manata qarşı ödəniş olmayıb, “Bakı Beynəlxalq Dəniz Ticarət Limanı” QSC üzrə isə 1,4 mln. manat hesablamaya qarşı 17,1% həcmində və ya 0,2 mln. manat ödəniş olub.