Finss.az - 2025-ci ilin yanvar-aprel aylarında ölkədə ictimai iaşə xidmətləri sahəsində dövriyyə 764 milyon manat təşkil edib ki, bu da 2024-cü ilin müvafiq dövrü ilə müqayisədə real ifadədə 17,7 faiz artım deməkdir.

Dövlət Statistika Komitəsinin məlumatına əsasən, özəl sektorda dövriyyənin 51,1 faizi hüquqi şəxslərin, 48,9 faizi isə fiziki şəxslərin payına düşür. Hüquqi şəxslər üzrə dövriyyə 2024-cü ilin eyni dövrü ilə müqayisədə 17,6 faiz artaraq 386,6 milyon manat olub. Qeyri-dövlət mülkiyyətində olan ictimai iaşə obyektləri 756,3 milyon manat dövriyyə ilə ümumi göstəricinin əsas hissəsini təşkil edir.

2025-ci ilin ilk dörd ayında aylar üzrə dövriyyə də artım dinamikası göstərib. Məsələn, yanvar ayında 187,9 milyon manatlıq dövriyyə qeydə alınaraq əvvəlki ilin eyni dövrünə nisbətən 21,2 faiz artıb. Fevral və mart aylarında da müvafiq olaraq 17,8% və 14,1% artım müşahidə olunub. Aprel ayı isə 18,2 faiz artımla 202,7 milyon manat dövriyyə ilə yadda qalıb.

Ümumilikdə, ictimai iaşə sahəsində sabit artım davam edir və bu da xidmət sektorunda canlanmanın göstəricisi kimi qiymətləndirilir.