Finss.az xəbər verir ki, Avropanın aerokosmik korporasiyası Airbus SE, onun təyyarələrinin istehsalı ilə məşğul olan Amerika təyyarə komponentləri təchizatçısı Spirit AeroSystems Holdings-in aktivlərini alır.

Bu, Boeing Co-ya 2005-ci ildə Amerika konsernindən ayrılan Spirit-in alınması ilə bağlı sövdələşməni başa çatdırmağa imkan verəcək. Boeing ciddi maliyyə problemləri yaşayan Spirit-i borcla birlikdə 8,3 milyard dollara almaq niyyətini ötən ilin yayında açıqlamışdı.

Airbus, ABŞ və Fransada A350 təyyarələri üçün komponentlər istehsal edən müəssisələr alacağını açıqladı. Sövdələşməyə həmçinin A220 təyyarələri üçün hissələrin istehsalı ilə məşğul olan, o cümlədən ABŞ, Şimali İrlandiya və Mərakeşdəki fabriklər də daxildir.

Aktivlərin alınması Airbus-a öz kommersiya təyyarələrinin istehsalı proqramları üçün komponentlərin sabit təchizatını təmin etməyə imkan verəcək, bəyanatda deyilir.

Airbus müqavilənin bir hissəsi olaraq Spiritdən 439 milyon dollar təzminat alacaq.

Airbus qeyd edir ki, əməliyyatın bağlanması və aktivlərin rəsmi təhvil verilməsi 2025-ci ilin üçüncü rübündə planlaşdırılır. Avropa şirkəti Spirit-ə Airbus proqramlarını dəstəkləmək üçün istifadə olunacaq ümumi məbləği 200 milyon dollar olan kredit xətləri verəcək.

Spiritin press-relizində deyilir ki, aktivlərin Airbus-a ötürülməsi Boeing ilə müqavilənin bağlanması ilə eyni vaxtda baş verəcək.

Airbus səhmləri bazar ertəsi ticarətdə 1,7% bahalaşıb. Bu ilin əvvəlindən onların dəyəri 7,7% azalıb.