Moskva mənzil bazarında güzəştli ipotekanın ləğvi satışların 40% azalmasına səbəb oldu.

Finss.az xəbər verir ki, Moskva və Moskva ətrafında tikilməkdə olan mənzillərin satışları iyul ayında kəskin şəkildə azalıb. Ən böyük azalma Moskva ətrafındakı yeni tikililərdə, yəni Podmoskovyada qeydə alınıb — satışlar 50% azalıb. Yeni Moskvada bu rəqəm 41%, Köhnə Moskvada isə 31% təşkil edib.

2024-cü ilin iyul ayında, güzəştli ipoteka proqramının ləğvindən sonra ilk ayda, Moskva və Moskva vilayəti üzrə yeni tikililər bazarında cəmi 10,9 min mənzil və apartament alqı-satqısı qeydə alınıb ki, bu da iyun ayı ilə müqayisədə 40% azdır. İllik ifadədə isə satışlarda 18%-lik azalma müşahidə olunub. Bu məlumatlar Dataflat xidmətinin hesabatında əks olunub.

Paytaxt regionundakı tikinti şirkətlərinin gəlirləri iyul ayında 30% azalaraq 185,3 milyard rubla düşüb. Bununla belə, ötən ilin iyul ayı ilə müqayisədə azalma cəmi 1% təşkil edib.

Xatırladaq ki, iyulun 1-dən etibarən yeni tikililər üçün 8%-lik güzəştli ipoteka proqramı başa çatdı. Proqramın sona çatmasına yaxın tikilməkdə olan mənzillərə tələbatda artım müşahidə olunmuşdu. Dataflat-ın məlumatına görə, iyun ayında Yeni Moskvada yeni tikililərin satışları 49%, Köhnə Moskvada 9%, Moskva vilayətində isə 30% artım göstərmişdi.

Analitik mərkəzlərin hesabatları da bu tendensiyanı təsdiqləyir. CIAN.Analitik-in məlumatına görə, 2024-cü ilin iyul ayında paytaxt regionunda iyun ayı ilə müqayisədə 38%, ötən ilin eyni dövrü ilə müqayisədə isə 18% az sayda DDU (paylı tikinti müqaviləsi) bağlanıb. "Metrium" şirkətinin icraçı direktoru Ruslan Sırtçovun sözlərinə görə, bu ilin iyul ayında Moskvanın ilkin mənzil bazarında tələbat 35%, ötən ilin eyni dövrü ilə müqayisədə isə 10,4% azalıb.