İqtisadi İslahatların Təhlili və Kommunikasiya Mərkəzi (İİTKM) və Bakı Avrasiya Universitetinin birgə təşkilatçılığı ilə “Yaşıl dünya naminə həmrəylik ili” çərçivəsində “Azərbaycanın işğaldan azad edilmiş ərazilərinin yaşıl inkişaf imkanları” mövzusunda respublika konfransı keçirilib.

Fins.az xəbər verir ki, konfransda İİTKM-in icraçı direktorunun müavini, iqtisad elmləri doktoru Ramil Hüseyn yaşıl iqtisadiyyat, yaşıl enerji, işğaldan azad edilmiş ərazilərin yaşıl inkişaf imkanları və digər istiqamətlər üzrə çıxış edib.

İİTKM-in şöbə müdiri, iqtisad elmləri doktoru Aqil Əsədov ölkəmizdə alternativ enerji mənbələrinə investisiya qoyuluşundan, işğaldan azad edilmiş ərazilərdə bu sahədə görülmüş işlərdən danışıb, yaxın gələcəkdə neft ölkəsi kimi tanınan Azərbaycanın dünyaya yaşıl enerji ixracatçısı kimi çıxacağını vurğulayıb.

Konfransın digər çıxışçıları cəmiyyətdə yaşıl münasibətlərin və yaşıl düşüncənin formalaşması, eləcə də işğaldan azad edilmiş ərazilərdə yaşıl inkişaf imkanları haqqında öz fikirlərini bölüşüblər; mövzunun aktuallığına diqqəti yönəldərək, konfransın həm də gələcək nəsillərin qarşısında məsuliyyət hissinin formalaşdırılması istiqamətində mühüm addım olduğunu qeyd ediblər.

Konfransa ümumilikdə 10-dan çox dövlət qurumundan və universitetdən nümayəndələr və elm adamları qatılıblar, ümumilikdə 60-dan çox məruzəçi “Azərbaycanın işğaldan azad edilmiş ərazilərində iqtisadi artımın yaşıl amilinin qiymətləndirilməsi”, “Yaşıl maliyyə: perspektivlər və məhdudiyyətlər”, “Yaşıl iqtisadiyyatın əsas prinsipləri və Azərbaycanda yaşıl biznes” və digər mövzularda məruzələr təqdim ediblər.

Fuad Mədətov
Fins.az