Azərbaycanda mobil telefon, elektronika və məişət texnikası satışı üzrə fəaliyyət göstərən ən böyük mağaza şəbəkələrindən biri “İrşad” ötən ilin nəticələrinə görə 2023-cü ildə də bu sektorda öz mövqeyini qoruyub saxlayıb.

2023-cü ildə “İrşad”ın əldə etdiyi iqtisadi gəlirlər fonunda dövlət büdcəsinə vergi və sosial köçürmələr formasında ödənişlər davam etdirilib. 2023-cü ildə “İrşad” tərəfindən dövlət büdcəsinə ödənilən əlavə dəyər vergisi (ƏDV) 43% artaraq 54 milyon 256.6 min manata, idxal rüsumu 65.5% artaraq 25 milyon 620,6 min manata, əmlak vergisi isə 20.6% artaraq 820 min manata yüksəlib. Şirkət təkcə ötən il dövlət büdcəsinə 86 milyon 524,6 min manat vergi ödəyib.

Bundan əlavə, “İrşad”ın 2023-cü ildə Məcburi Dövlət Sosial Sığorta ödəmələri (DSMF) 38% artaraq 3 milyon 705 min manat, sosial sığorta və işsizlikdən sığorta ödəmələri 38% artaraq 148 min 191 manat, icbari tibbi sığorta ödəmələri isə 45% artaraq 624 min 146 manat təşkil edib.

Ümumilikdə, “İrşad Electronics” MMC-nin 2023-cü ildə dövlət büdcəsinə, vergi və sosial müdafiə ödəmələri 2022-ci illə müqayisədə 48% çoxdur.

Şirkətin ötən il işçi sayı 250 nəfər artaraq 1108 nəfərə çatıb, bu da ölkənin məşğulluq bazarında böyük rolu olmasından xəbər verir.

“İrşad” fəaliyyəti dövründə filial şəbəkəsini də artırıb. Belə ki, Bakıda 23, bölgələrdə 24 mağazası və 3 texniki servis məntəqəsi ilə müştərilərinə xidmət göstərib. Ötən il işğaldan azad olunmuş ərazilərdə ilk elektronika mağazasını açan şirkət “Füzuli” mağazasına işçi yığımını davam edir.

“İrşad” müştərilərə daha əlçatan olmaq üçün mobil tətbiqi vasitəsilə də bir çox xidmətlər göstərib. Şirkətin “Bonus” xidmətindən minlərlə müştəri yararlanıb.