Martın 19 və 20-də Londonda Qlobal Hökumət Forumunun (Global Government Forum) "İnnovasiya 2024" tədbiri keçirilib. İqtisadiyyat Nazirliyinin tabeliyindəki Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərov “Süni İntellekt və maşın öyrənməsində innovasiya” sessiyasına spiker qismində qatılıb. O, “Dövlət sektorunu #Süniİntellekt üçün necə hazırlamaq olar?” mövzusunda təqdimatla çıxış edib.

Fariz Cəfərov bildirib ki, qlobal miqyasda dövlət sektorunu Süni İntellekt dövrünə hazırlamaqdan ötrü 5 əsas məqsəd üzrə fəaliyyət tələb olunur: təhsil və işçi qüvvəsinin inkişafı, tədqiqat və innovasiya, tənzimləyici çərçivə və etik məsələlər, infrastruktur və dataların idarə olunması, beynəlxalq əməkdaşlıq.

Daha sonra Azərbaycanda dövlət xidmətləri sahəsində aparılan islahatlar, vətəndaşlara təqdim olunan xidmətlər, o cümlədən ASAN xidmət mərkəzlərinin fəaliyyəti, elektron və rəqəmsal hökumət sahəsində görülən işlər, təqdim olunan rəqəmsal həllər, yanaşmalar və uğurlu təcrübələr paylaşılıb. Hazırda ölkənin 2030-cu ilə qədər olan dövrü əhatə edən rəqəmsal iqtisadiyyat strategiyasının hazırlandığı qeyd olunub və bu strategiya çərçivəsində icra olunması planlaşdırılan təcrübə və təşəbbüslər, eləcə də hazırda mərkəz tərəfindən süni intellekt sahəsində icra edilməkdə olan layihələr barədə məlumat verilib.

Böyük Britaniya Hökuməti, Böyük Britaniya Dövlət Xidməti və Nazirlər Kabinetinin birgə ev sahibliyi etdiyi Qlobal Hökumət Forumu sərgi-konfransı dünyanın hər yerindən dövlət sektoru təşkilatlarının və xidmətlərinin transformasiyası və sürətləndirilməsinə cavabdeh olan hökumət liderlərini, qabaqcıl texnologiya və məsləhət şirkətlərini bir araya gətirən unikal tədbirdir. Bu il tədbirə 70 ölkədən 4000 nəfərdən çox iştirakçı qatılıb.

Tədbirdə innovasiya ekosisteminin dayanıqlı və şəffaf inkişafında dövlət və özəl sektorlarının rolu və öhdəlikləri, bu istiqamətdə qarşıya çıxan çağırış və uğurlu təcrübələrin mübadiləsinə dair müzakirələr yer alıb.