Mayın 16-da Avropa Yenidənqurma və İnkişaf Bankının (AYİB) Özbəkistan Respublikasının Səmərqənd şəhərində növbəti illik toplantısı keçirilib.
Fins.az xəbər verir ki, “Dayanıqlılığa investisiya” şüarı altında biznes-forum formatında təşkil edilən toplantı dayanıqlı qlobal iqtisadiyyat yaratmaq üçün praktiki strategiyaları müzakirə etmək məqsədilə siyasətçiləri, biznes liderlərini və ekspertləri bir araya gətirib. Forum zamanı üzv ölkələr tərəfindən ötən il təqdim edilən müxtəlif layihələr 5 nominasiya üzrə qiymətləndirilib.
“Aztelekom” MMC tərəfindən təqdim edilən və “Onlayn Azərbaycan” layihəsinin tərkib hissəsi kimi Azərbaycanın regionlarında təxminən 280 mindən çox ev təsərrüfatına ən müasir genişzolaqlı infrastrukturun tətbiqinin həyata keçirilməsinin nəzərdə tutulduğu müqavilə münsiflər heyəti tərəfindən yüksək qiymətləndirilib və “Digital Policy Engagement of the Year (İlin rəqəmsal cəlbetmə siyasəti)” mükafatına layiq görülüb.
Məlumat üçün bildirək ki, “Rəqəmsal mükafatlar” AYİB və onun bütün sektorlarından olan müştəriləri tərəfindən cəsarətli və innovativ rəqəmsallaşma layihələrinə təntənəli surətdə təqdim edilir.
Xatırladaq ki, ötən il dekabrın 22-də “Aztelekom” MMC-nin genişzolaqlı internet şəbəkəsinin genişləndirilməsi layihəsinin maliyyələşdirilməsi ilə bağlı Avropa İttifaqının dəstəyilə “Aztelekom” MMC və AYİB arasında 50 milyon ABŞ dolları (85 milyon AZN) dəyərində kredit müqaviləsi imzalanıb.
“Aztelekom” cəlb olunan maliyyə vəsaitini “Onlayn Azərbaycan” layihəsinin əsas operatoru kimi regionlarda həyata keçiriləcək infrastrukturun yenidən qurulması üçün istifadə edəcək. Beləliklə, şirkət şəbəkənin sürət, tutum və ötürmə qabiliyyətini yaxşılaşdıraraq, şəhər və kənd yerləri arasında rəqəmsal bərabərsizliyi azaltmağa nail olacaq. Bu, “Aztelekom”a yüksək keyfiyyətli, fasiləsiz internet xidmətini təmin etməyə və bütün ölkə üzrə internetin orta sürətini artırmağa imkan verəcək.
Rəqəmsal İnkişaf və Nəqliyyat Nazirliyi tərəfindən həyata keçirilən və əsas operatoru “Aztelekom” MMC olan “Onlayn Azərbaycan” layihəsi çərçivəsində 2024-cü ilin sonuna qədər sürətli internetlə ölkənin bütün ərazisini əhatə edən genişzolaqlı şəbəkənin qurulması planlaşdırılır.