Azərbaycanın 2023-cü il üçün dövlət büdcəsinin gəlirləri və xərcləri 53 milyon 278 min manat artırılır.

Bunu Milli Məclisin İqtisadi siyasət, sənaye və sahibkarlıq Komitəsinin sədri Tahir Mirkişili qurumun bu gün keçirilən iclasında bildirib.

Onun sözlərinə görə, yenilənmiş layihədə büdcə gəlirləri 30 milyard 720 milyon 700 min manatdan 30 milyard 773 milyon 978 min manata, büdcə xərcləri isə 33 milyard 300 milyon manatdan 33 milyard 353 milyon 278 min milyon manata qaldırılır.

Naxçıvan Muxtar Respublikasında Dövlət Gömrük Komitəsinin ləğv olunub yeni Baş Gömrük İdarəsinin yaradılması ilə 53,2 milyon manat daxilolmanın dövlət büdcəsinə aid edilməsi vacib hesab edilir.

Bunu bu gün Milli Məclisin İqtisadi siyasət, sənaye və sahibkarlıq komitəsinin iclasında maliyyə naziri Samir Şərifov bildirib.

Nazir bildirib ki, Baş idarənin saxlanmasına dövlət büdcəsindən 20,1 milyon manat ayrılacaq: "Avtomobil Yolları Məqsədli Büdcə Fondunun xərcləri 0,5 milyon manat olmaqla, cəmi 20,6 milyon manat vəsaitin Naxçıvan MR-nın büdcə xərclərindən azaldılaraq Dövlət Gömrük Komitəsinin xərclərinə proqnozlaşdırılması zərurəti yaranıb. Naxçıvan Muxtar Respublikasında gömrük orqanlarının maliyyələşməsi mərkəzləşmiş xərclərə ötürülüb. Orada aparılacaq işlər nəticəsində optimallaşmanı görəcəyik. Xərclərdə hər hansı bir qənaət olduğu halda daha az transfert veriləcək. Bunu tənzimləyəcəyik. Dotasiya ilə bağlı isə hər hansı tələsik qərar qəbul edilməsi məqsədəuyğun deyil".

© "Report", APA