Yüksək Texnologiyalar Parkında “İnkubator və Texnologiya Transferi Mərkəzi” yaradılıb

AMEA Yüksək Texnologiyalar Parkında (YTP) “İnkubator və Texnologiya Transferi Mərkəzi” fəaliyyətə başlayıb. YTP-dən fins.az verilən məlumata görə, mərkəzin yaradılması akademiyanın elmi müəssisə və təşkilatlarında əldə olunan innovativ perspektivli elmi nailiyyətlərin tətbiqini və beynəlxalq elmi-innovativ fəaliyyətin gücləndirilməsini nəzərdə tutur.

Mərkəz həmçinin innovasiyalı texnologiyaların vahid məlumat bazasının yaradılmasını, bu texnologiyaların kommersiya potensialının qiymətləndirilməsini, innovasiya fəaliyyəti və texnologiyaların transfer məsələləri üzrə elmi-tədqiqat sifarişləri elmi-tədqiqat institutuna yönləndirilməsini, o cümlədən innovasiya idarəetmə proseslərinin koordinasiyasını həyata keçirəcək.
Mərkəzin səmərəli fəaliyyəti texnoparkın iqtisadi və intellektual potensialının inkişafına, AMEA-nın büdcədən asılılığının azalmasına, işçilərin sosial rifahına, elm və tədqiqat nəticələrinin iqtisadi və praktik tətbiqinin genişlənməsinə, eləcə də innovativ inkişafa özəl investisiyanın cəlb edilməsinə və elmin populyarlaşdırılmasına dəstək verəcək.