Finss.az - ABŞ-ın əsas fond indeksləri cümə axşamı mənfi dinamika nümayiş etdirib.

İnvestorlar Federal Ehtiyat Sisteminin yanvar iclas protokolunu və makroiqtisadi göstəriciləri təhlil ediblər.

Dərc olunan sənəd göstərib ki, FES inflyasiyanın dayanıqlı şəkildə zəiflədiyinə əmin olmadan faiz dərəcələrinin endirilməsinə tələsmək istəmir. Bununla yanaşı, yüksək inflyasiya ssenarisi fonunda pul-kredit siyasətinin sərtləşdirilməsi ehtimalı da müzakirə mövzusu olub.

Makroiqtisadi göstəricilər isə ziddiyyətli siqnallar verib. Xarici ticarət kəsiri proqnozları üstələyərək 70,3 milyard dollara yüksəlib. Digər tərəfdən, işsizlik müavinəti üçün müraciətlərin azalması əmək bazarında sabitliyin qorunduğunu göstərib.

Korporativ sektorda da hərəkətlilik müşahidə olunub.

Walmart səhmləri 1,4% ucuzlaşıb. Şirkətin xalis mənfəəti azalsa da, gəliri artıb.

Deere Company səhmləri 11,7% bahalaşıb. Şirkət proqnozlardan yüksək gəlir açıqlayıb.

DoorDash kapitallaşmasını 1,6% artırıb.

Analog Devices səhmləri 0,3% geriləyib.

eBay 3,1% yüksəlib.

Carvana səhmləri 8% ucuzlaşıb.

Herbalife səhmləri futbolçu Cristiano Ronaldo tərəfindən 7,5 milyon dollarlıq investisiya xəbəri fonunda 18% artıb.

Əsas indekslərə gəlincə:

• Dow Jones Industrial Average – 0,54% azalaraq 49 395,16 bənd

• SP 500 – 0,28% azalaraq 6 861,89 bənd

• Nasdaq Composite – 0,31% azalaraq 22 682,73 bənd

Analitiklər bildirirlər ki, yaxın günlərdə bazarların istiqaməti inflyasiya göstəriciləri və FES-in gələcək qərarları ilə müəyyən olunacaq.